өлі кеңістік

(Мертвое пространство)

залалданбайтын кеңістік, атыс позициясынан ату кезінде снарядтың, ракетаның, оқтың және басқалардың тікелей тиюінен нысана жойылмайтын атыс қашықтығының негізіндегі кеңістік. Ө.к-тің аумағы қарудың конструкциялық ерекшеліктері мен баллистикалық қасиеттеріне (снарядты, ракетаны, оқты және т.б. көтеру бұрыштарының өлшеміне), нысана орналасқан жер бедеріне, тасаның биіктігі мен еніне, осы тасадан атыс позициясының орналасу қашықтығына байланысты. Ө.к-тің қарудың конструкциялық ерекшелігіне байланысты тереңдігі орташа есеппен (тегіс жерде) танкілерде 40 м-ге дейін, танкіге қарсы басқарыла-тын ракетада 75—100 м-ден 500—600 м-ге дейін, тактикалық ракеталарда — бірнеше км, оперативтік-тактикалық ракеталарда ондаған км. Ө.к-тің аумағы берілген қарудан атудың ең аз қашықтығына сәйкес келеді. Әуе нысаналарын зенитті қарумен атқанда пайда болатын Ө.к. өлі түтікше деп аталады.